PN-BESI-TL Realiza Enkontru Regular Membru no Parseiru sira
Dili, 19 Marsu 2024-Plataforma Nasionál Bee, Saneamentu no Ijiene Timor-Leste (PN-BESI TL) realiza enkontru regular membru no parseiru sira iha Salaun FONGTIL, Caicoli. Objetivu husi enkontru ida ne’e mak atu Atualiza Progresu Servisu atividade no programa sira ne'ebe mak PN-BESI-TL ho membru organizasaun sira implementa ligadu ho Bee, Saneamentu no Ijiene, Igualdade Jéneru, Defisiénsia no Inkluzaun Sosiál, no Mudansa Klimátika iha Timor-Leste.
Prezidente Konsellu PN-BESI TL iha nia introdusaun hateten Bee no Saneamentu hanesan direitu báziku ba sidadaun hotu-hotu hodi garante sira-nia moris ida ne'ebé saudável no seguru. Maibe iha Timor-Leste setór BESI sei sai hanesan problema boot ida inklui mudansa klimátika ne'ebé bele mós prejudika ba bee menus. Enkuantu, Metas Dezenvolvimentu Sustentável ba 2030 katak ema hotu-hotu tenke asesu ona Bee-moos ho seguru no Saneamentu ne'ebé Ijiene.Tanba ne'e, papél PN-BESI-TL importante tebes atu halo advokásia ho ita-nia deskobrimentu sira ne'ebé ita iha ona no kontinua buka informasaun atu haforsa liu tan ita-nia advokásia ba setór ida ne'e.
Reprezentante WATL iha nia intervensaun katak WATL apoiu ona estratejia lubuk ida ba PN-BESI TL atu halo halo advokásia ne'ebé kuaze atu hanesan mós estratéjia PN-BESI-TL nian rasik. No husu nafatin buka estratéjia seluk ba advokásia atu atinji ita-nia misaun sira. Nune'e mós esforsu nafatin hodi halibur dadus sira hodi haforsa liu tan ita-nia advokásia iha setór BESI.
Atividade ida ne’e hetan partisipasaun husi WATL, FONGTIL, La'o Hamutuk membru organizasaun sira inklui membru konsellu PN-BESI-TL.
